Алматыдағы MMA жекпе-жегі шулы нокаутпен аяқталды (ВИДЕО)
Алматыдағы Octagon 78 аралас жекпе-жек кешінде Қазақстан мен Өзбекстан спортшылары арасындағы айқас ерте тоқтатылды. Жартылай орта салмақтағы жекпе-жекте қазақстандық Герман Ефремов (2-0) пен өзбекстандық Афзалбек Абдурахимов (1-1) октагонға шықты.
Жекпе-жектің шешуші сәті
Абдурахимов қарсыласын бірінші раундта дәл салынған тепкімен бауыр тұсынан сұлатып түсірді. Қатты соққыдан кейін Ефремов ауырсынуға төтеп бере алмай, қорғаныссыз қалды. Рефери дереу жекпе-жекті тоқтатып, техникалық нокаут тіркелді. Осылайша өзбек файтері нокаутпен жеңіске жетіп, қазақстандықтың кәсіби мансабындағы алғашқы жеңілісті жазды.
Турнирдің басты айқасы
Octagon 78 кешінің басты жекпе-жегінде жартылай орта салмақтағы чемпиондық белбеу сарапқа салынады. Онда қазақстандық Богдан Пшебельский (6-2) өзбекстандық Саидатахон Нуриддиновпен (8-3) кездеседі. Бұл кездесу жанкүйерлер арасында ерекше қызығушылық тудырып отыр.