Отандасымыз бұл кездесуде қарсыласын техникалық нокаутпен жеңіп, титулын сақтап қалды.
Қазақстандық ММА файтері Жалғас Жұмағұлов Чехия өкілі Давид Дворжакты жеңіп, Oktagon лигасындағы чемпиондық белбеуін сәтті қорғады. Бұл жекпе-жекке RDXsports.com шолушысы Саймон Хэд жоғары баға берді.
Жекпе-жек Прагада өткен Oktagon 81 турнирінде өтіп, аса жеңіл салмақтағы чемпиондық белбеу сарапқа салынды. Жұмағұлов бұл кездесуде қарсыласын техникалық нокаутпен жеңіп, титулын сақтап қалды.
Саймон Хэдтің жазуынша, Жалғас Жұмағұлов Давид Дворжакты мерзімінен бұрын тоқтатқан екінші файтер. Бұған дейін чех спортшысы жоғары деңгейлі қарсыластарға қарсы тұрақты өнер көрсетіп келген.
«Жұмағұлов Oktagon-дағы чемпиондық белбеуін техникалық нокаутпен қорғап қана қоймай, енді екінші салмақта да титул үшін айқасуға ниетті екенін көрсетті», — деп жазды шолушы.
Айқастың үшінші раундының соңында Жұмағұловтың жойқын оң жақ соққысы Дворжакты теңселтіп жіберді. Чех файтері құламағанымен, тепе-теңдігін жоғалтты. Осы сәтті пайдаланып, қазақстандық чемпион қарсыласын қатты қысымға алып, соққылар сериясын жасады.
Дворжак үшінші раундты аяқтағанымен, оның көмекшілері алаңдаушылық білдіріп, спортшыны төртінші раундқа шығарудан бас тартты. Тор жанындағы дәрігер жекпе-жекті тоқтату туралы шешім қабылдады.
Осылайша, Жалғас Жұмағұлов үшінші раундта техникалық нокаутпен жеңіске жетіп, Oktagon лигасындағы аса жеңіл салмақтың чемпионы атағын сәтті қорғады.