Жалғас Жұмағұлов екінші титулдық жекпе-жек алдында қарсыласын нокаутпен жеңді (ВИДЕО)
Қазақстандық файтер Жалғас Жұмағұлов Алматыда IBA Nomad 14 турнирінде жанкүйерлерін жарқын жеңіспен қуантты.
Нокаутпен тіркелген жеңіс
Қазақстан өкілі бұл кеште қырғыз Қайрат Нұрбай уулумен кездесті. Жекпе-жек жеңіл салмақта өтіп, ММА-ның тік тұру ережесі бойынша ұйымдастырылды.
Қос файтер үшін де бұл Nomad FC лигасындағы алғашқы жекпе-жек болды. Кездесу ұзаққа созылған жоқ. Жұмағұлов қарсыласын бірінші раундта нокаутпен жеңді.
Сәтті дебют
Осылайша қазақстандық файтер жаңа промоушндегі алғашқы кездесуін жеңіспен аяқтап, өз деңгейін тағы бір мәрте дәлелдеді. Ал Қайрат Нұрбай уулу лигадағы жолын жеңіліспен бастауға мәжбүр болды.
Еске салайық, Жалғас Жұмағұлов келесі жекпе-жегін 6 маусымда өткізеді. Ол Oktagon лигасында жеңіл салмақ дәрежесіндегі чемпиондық белбеу үшін бразилиялық Игор Севериноға қарсы шығады.
Бұл айқас қазақстандық файтер үшін айрықша маңызға ие. Себебі Жұмағұлов алдағы кездесуде мансабындағы екінші титулды жеңіп алуға талпыныс жасайды.