Тағы бір медаль: Ақжүрек Қалабай қарсыласын ойсырата жеңді (ВИДЕО)
Қазақстандық боксшы Ақжүрек Қалабай Индонезияда өтіп жатқан жастар арасындағы Азия чемпионатының жартылай финалына шықты. Отандасымыз ширек финалда Сауд Арабиясы өкілін айқын басымдықпен жеңіп, кемінде қола медальға кепілдік алды.
Джакартада бокстан U19 және U23 жас санаттары арасындағы Азия чемпионаты жалғасып жатыр. Қазақстан құрамасының өкілі Ақжүрек Қалабай 23 жасқа дейінгі спортшылар арасындағы турнирде 65 келіге дейінгі салмақта ширек финалдық жекпе-жек өткізді.
Ширек финалда Ақжүрек Қалабай Сауд Арабиясының өкілі Зиад Әлшехримен кездесті. Жекпе-жек барысында қазақстандық боксшы қарсыласына қарағанда белсендірек қимылдап, рингтегі жағдайды бақылауда ұстады. Қалабай соққыларын дәлірек жеткізіп, үш раунд бойы басымдық танытты.
Кездесу толық үш раундқа созылды. Жекпе-жек қорытындысы бойынша бес төрешінің бәрі жеңісті Ақжүрек Қалабайға берді.
Қазақстан қоржынына тағы бір медаль түсті
Жартылай финалға шығу Ақжүрек Қалабайға кемінде қола медальді қамтамасыз етті. Бокста жартылай финалға жеткен спортшылардың барлығы жүлдегер атанады.
Енді Қалабай финалға шығу үшін келесі қарсыласымен жұдырықтасады.
Азия чемпионаты Джакартада өтіп жатыр
Жастар арасындағы Азия чемпионаты World Boxing ұйымының құрлықтық құрылымы — Asian Boxing аясында ұйымдастырылып жатыр.
Бұл форматтағы жарыс екінші рет өткізіліп отыр. Алғашқы чемпионат 2025 жылдың тамызында Бангкокта өткен еді. Биылғы турнир 4 шілдеде Индонезия астанасы Джакартада басталды.
Жалпы Азия біріншілігіне 330-ға жуық спортшы қатысады. Қазақстан құрамасы турнирде бірнеше салмақ дәрежесінде медаль үшін күресін жалғастырып жатыр.