Головкин басқаратын World Boxing құрамына тағы алты федерация қосылды
Геннадий Головкин президенттік ететін World Boxing халықаралық бокс ұйымының қатары кеңейе түсті.
Алты федерация арнайы тексерістен өтті
World Boxing құрамына Чад, Конго Демократиялық Республикасы, Эфиопия, Либерия, Кувейт және Йеменнің бокс федерациялары енді. Жаңа мүшелер ұйымға қабылданар алдында бірнеше бағыт бойынша қатаң тексеруден өткен.
Атап айтқанда, ұлттық федерациялар басшылық органдарын ашық әрі әділ сайлау тетігінің бар екенін көрсетуге міндетті болды. Сонымен қатар олардың Дүниежүзілік допингке қарсы агенттік — WADA талаптарына сәйкес антидопингтік саясаты мен рәсімдері болуы қажет.
Бұдан бөлек, даулар мен апелляцияларды қараудың тәуелсіз немесе сыртқы тараптардың қатысуын қамтамасыз ететін жүйесі де бағаланған.
Тексеру нәтижесінде алты федерация World Boxing талаптарына сай деп танылды.
Федерациялар саны 184-ке жетті
Жаңа ұйымдардың қосылуы World Boxing-тің әсіресе Африка құрлығындағы ықпалын күшейтті. Қазір халықаралық ұйымның жарыстарына қатысуға құқығы бар 184 ұлттық федерация тіркелген.
Олардың ішінде:
- 122-сі — толыққанды мүше;
- біреуі — қауымдастырылған мүше;
- 61 федерация — мақұлданған мүше мәртебесіне ие.
Бұған дейін World Boxing құрамында 180 федерация болған. Бірақ кейін бір ұлттық федерацияның мүшелігі уақытша тоқтатылып, тағы бір ұйымның мүшелік мәртебесі жойылды.
Эквадор федерациясының мүшелігі неге тоқтатылды?
Эквадор бокс федерациясының мүшелігі бұған дейін қол жеткізілген келісімнің талаптары орындалмаған соң уақытша тоқтатылған.
World Boxing хабарлауынша, федерация ескерту алғаннан кейін жағдайды түзетуге қажетті шараларды қолға алған.
Эквадор тарапы қыркүйек айында Бас ассамблея өткізуді жоспарлап отыр. Ұйым бұл жиын туындаған мәселені шешуге мүмкіндік береді деп күтеді.
Камерунның өтініші кері қайтарылды
Камерун ұлттық бокс федерациясының World Boxing-ке қосылу жөніндегі өтініші 2026 жылдың сәуірінде мақұлданған.
Дегенмен кейін ұсынылған құжаттарға қосымша сараптама жүргізіліп, олардың ұйымның мүшелік талаптарына толық сәйкес келмейтіні анықталды. Осыдан кейін бұрынғы шешім күшін жойды.
Қазір Камерунның Ұлттық Олимпиада комитеті мен Спорт министрлігі бірлесіп жаңа өтінім әзірлеп жатыр. Оның жақын арада қайта тапсырылуы жоспарланған.
Жаңа мүшелер әзірге дауыс бере алмайды
World Boxing жарғысына сәйкес, ұйымға жаңадан қосылған алты федерацияға Endorsed Member, яғни мақұлданған мүше мәртебесі берілді.
Бұл мәртебе оларға World Boxing ұйымдастыратын ресми жарыстарға қатысуға мүмкіндік береді. Алайда олар 2026 жылғы Конгресте дауыс бере алмайды.
Дауыс беру құқығына ие болу үшін федерациялар Full Member — толыққанды мүше мәртебесін алуы тиіс.
Шешім Панамада қабылданады
Толыққанды мүшелік мәртебесін тек World Boxing-тің ең жоғары басқарушы органы — Конгресс бекіте алады. Жаңа алты федерацияның мәртебесі 2026 жылдың 20 қарашасында Панамада өтетін World Boxing Конгресінде дауысқа салынады.
Егер олардың өтініштері сол жиында ратификацияланып, толыққанды мүше мәртебесі берілсе, федерациялар 2027 жылғы Конгрестен бастап дауыс беру құқығына ие болады.
Геннадий Головкин World Boxing-ті басқарады
World Boxing ұйымының қазіргі президенті — қазақстандық кәсіпқой бокстың даңқты өкілі Геннадий Головкин.
GGG 2025 жылдың 23 қарашасында Римде World Boxing Конгресінде ұйым президенті болып ресми түрде сайланған. Оның өкілеттік мерзімі үш жылға есептелген және 2028 жылдың қарашасына дейін жалғасады.