Ресейлік қазақ боксшы АҚШ-та қарсыласын 81-секундта нокаутқа түсірді
Этникалық қазақ боксшы Альбина Молдажанова АҚШ-та кәсіпқой рингтегі кезекті жарқын жеңісіне жетті.
Қарсыласын 81-секундта тоқтатты
Жекпе-жек Калифорния штатындағы Темекьюла қаласында орналасқан Pechanga Resort Casino аренасында өтті. Түменнен шыққан қазақ қызы Альбина Молдажанова уругвайлық Шейла Фабиана Лизегангпен кездесті.
Молдажанова бірінші раундтың 81-секундында сол қолымен қарсыласының денесіне дәл соққы жасады. Ауыр соққыдан кейін Лизеганг рингке құлап, төрешінің санағына дейін орнынан тұра алмады. Нәтижесінде Альбина кәсіпқой бокстағы қатарынан мерзімінен бұрын бесінші жеңісін тіркеді.
Бұл нәтиже Шейла Фабиана Лизеганг үшін кәсіпқой мансабындағы алғашқы жеңіліс болды.
АҚШ-та кәсіпқой мансабын жалғастырады
Молдажанова кәсіпқой рингте алғаш рет 2025 жылдың сәуірінде Челябіде өткен IBA.PRO 2 турнирінде өнер көрсеткен.
2026 жылдың ақпанында ол АҚШ-қа көшіп, **Most Valuable Promotions (MVP)** промоутерлік компаниясымен ұзақмерзімді келісімшартқа қол қойған.
Америкадағы алғашқы жекпе-жегін 24 маусымда Калифорнияның Индио қаласында өткізген Альбина мексикалық Клаудия Эррера Лопесті екінші раундта нокаутқа түсірді.
Альбина Молдажанова әуесқой бокста Ресей әйелдер құрамасының сапында 63 және 66 келі салмақ дәрежелерінде өнер көрсетеді.
Оның басты жетістіктері:
- 2024 жылғы Ресей чемпионы;
- 2024 жылғы ересектер арасындағы Еуропа чемпионатының күміс жүлдегері;
- 2023 жылғы 22 жасқа дейінгі Еуропа чемпионы;
- 2025 жылғы әлем чемпионатының қола жүлдегері.