Аида Әбікееваның бапкері жұдырықтасу жекпе-жегіне шығуға дайын

Жекпе-жекке шығуға ниетті

Бокстан Қазақстан құрамасының бапкері Instagram парақшасында жаттығу залынан видео жариялады. Кадрда ол боксшылар дайындығының негізгі элементтерінің бірі – көлеңкемен жұдырықтасуды орындап жатыр.

Абдраимов 61 келі салмақта жалаң жұдырық форматындағы жекпе-жекке шығуға дайын екенін жеткізді.

"61 келіде жақсы гонорар үшін жұдырықтасуға шығамын. Ұсыныстарға ашықпын. Соңына дейін төбелесуге дайынмын. Let’s go! Қызықты жекпе-жек пен жақсы гонорар болса, мен дайынмын. Күні мен уақытын белгілеңіздер", – деп жазды бапкер.

Басты шарт – қызықты жекпе-жек пен лайық гонорар

Ислам Абдраимовтың сөзінен оның мұндай форматтағы айқасқа нақты қызығушылық танытып отырғанын аңғаруға болады. Жаттықтырушы қарсылас пен ұйымдастырушы тараптан лайықты ұсыныс түссе, жекпе-жек өткізуге дайын екенін ашық білдірді.

Әзірге оның ықтимал қарсыласы, турнир атауы немесе жекпе-жек өтетін күн туралы ресми ақпарат жоқ.

Ислам Абдраимов Қазақстан әйелдер құрамасының көшбасшыларының бірі Аида Әбікееваның жеке бапкері саналады. Бұған дейін Әбікеева 2026 жылы Жапонияның Айти-Нагоя аймағында өтетін жазғы Азия ойындарына қатысатын Қазақстан әйелдер құрамасының түпкілікті тізіміне енді.

Қазақстандық боксшы 65 келіге дейінгі салмақ дәрежесінде өнер көрсетеді.

Аида Әбікеева 2025 жылы бірден екі ірі халықаралық додада топ жарған. IBA және World Boxing нұсқалары бойынша әлем чемпионы атанып, Қазақстан әйелдер боксының негізгі жұлдыздарының біріне айналды.