"Алтынсыз қалмаймыз". Шымбергенов Азиадаға болжам жасады
Бокстан әлем чемпионы әрі Қазақстан құрамасының бұрынғы капитаны Асланбек Шымбергенов Жапонияда Азия ойындарына қатысты болжамын айтты.
Шымбергенов екі алтын медаль күтеді
Асланбек Шымбергеновтың болжамынша, қазақстандық боксшылар Жапониядағы додада екі алтын, бір күміс және бір қола медаль жеңіп алуы мүмкін.
"Осы Азия ойындарында алтын медаль міндетті түрде болады деп ойлаймын. Менің болжамым — қазақстандық боксшылар екі алтын, бір күміс және бір қола жүлде алады. Соңғы екі Азиадада алтынсыз қалдық. Енді бұл жағдай өзгереді деп сенемін", — деді Шымбергенов.
Егер бұл болжам орындалса, Қазақстан құрамасы Азия ойындарындағы 12 жылға созылған алтынсыз сериясын тоқтатады.
Шымбергеновтың Азиададағы жүлделері
Шымбергенов спорттық мансабында жазғы Азия ойындарына екі рет қатысып, екі медаль иеленген.
2018 жылы Индонезияның Джакартада өткен Азиадада 69 келіге дейінгі салмақ дәрежесінде күміс жүлдегер атанды.
Ал 2023 жылы Қытайдың Ханчжоу қаласында ұйымдастырылған кейінге шегерілген 2022 жылғы Азия ойындарында 71 келіде қола медаль жеңіп алды.
Қазақстан соңғы рет Азиада алтынын қашан алды?
Бокстан ерлер және әйелдер құрамалары Азия ойындарындағы соңғы алтын медальдарын 2014 жылы Оңтүстік Кореяның Инчхон қаласында жеңіп алған.
Сол турнирде қазақстандық боксшылар алты алтын медаль иеленіп, жалпыкомандалық есепте бірінші орынға шықты. Ел қоржынына ең жоғары жүлдені мына боксшылар салды:
- Ілияс Сүлейменов;
- Данияр Елеусінов;
- Жәнібек Әлімханұлы;
- Әділбек Ниязымбетов;
- Антон Пинчук;
- Иван Дычко.
Одан кейінгі 2018 және 2022 жылғы Азия ойындарында Қазақстан боксшылары финалдық кезеңдерге жеткенімен алтын медаль иелене алмады.