Шара Буллет - Майкл Пейдж айқасына берілген сыйақы мөлшері белгілі болды
Жуырда Эр-Риядта өткен жекпе-жекте "Дағыстандық қазақ" мансабында алғаш рет қарсыласынан жеңіліп қалған еді.
Жуырда британдық аралас жекпе-жек шебері Майкл Пейджке есе жіберген ресейлік файтер Шарабутдин Магомедов айқасқа берілетін сыйақы мөлшерін атады.
"Дағыстандық қазақтың" айтуынша, жеңіске жеткен кезде ол 300 мың доллар сыйақы алушы еді. Алайда Эр-Риядта өткен кездесуде Шара Буллет төрешілердің бірауыздан шешімімен қарсыласына есе жіберген болатын.
"Егер жеңгенімде сыйақы мөлшері 300 мың доллар болушы еді. Бірақ мен жеңіліп қалдым", - деді Магомедов баспасөз-мәслихатында.
Айта кетейік, 1-ақпанда Сауд Арабиясының астанасында өткен UFC Fight Night 250 турнирінде Шарабутдин Магомедов күтпеген жерден жеңіліп қалды. Бұл оның мансабындағы алғашқы жеңілісі.