"Мен қазақпын". Әлем чемпионы атанған ресейлік боксшы өз Отанын атады
Ресейлік боксшы Салтанат Меденова әйелдер арасындағы әлем чемпионатында жеңіске жеткеннен кейін ұлты мен туған жері туралы өз ойын білдірді.
Сербияның Ниш қаласында өткен бокстан әйелдер арасындағы әлем чемпионатының финалында Салтанат Меденова алтын медаль жеңіп алды. Ол 2024 жылғы Еуропа чемпионатының қола жүлдегері, 23 жасқа дейінгі екі дүркін Еуропа чемпионы Исильдар Бусруды (Түркия) жеңіп, 81 кг салмақ дәрежесінде үздік атанды.
Чемпиондық жеңісінен кейін Меденова эмоцияларымен бөлісті:
“Мен үшін ең басты арман – әлем чемпионы атану еді. Бұл ақшалай сыйақы үшін емес, менің басты мақсатым – жеңіс тұғырында тұрып, Ресейдің әнұранын орындау болды. Мен өзім – қазақпын. Маған Қазақстаннан көп адам жазып, “Туған жеріңе қайт” деп жатады. Бірақ менің туған жерім – Ресей. Осы жерде дүниеге келдім, осында өстім, – деп қосты Меденова.
Әлем чемпионатының жеңімпаздары 100 000 доллар көлемінде сыйақы алады.Күміс жүлдегерлерге – 50 000 доллар. Қола медаль иегерлеріне 25 000 доллар берілді.