"Жеңіліс емес, сабақ!" — Ризабек Айтмұхан финалдағы ауыр сәттен кейін шындықты айтты (ВИДЕО)
Амман қаласында өткен еркін күрестен Азия чемпионатының финалында жеңілген Ризабек Айтмұхан жекпе-жектен кейін алғашқы пікірін білдірді.
Ол 97 келіге дейінгі салмақта жапон балуаны Араша Йошидадан 1:7 есебімен жеңілді.
"Бүгінгі белдесуден кейін айтарым, бәрі басынан бастап жоспарлағандай өрбімеді. Қажетті ұпайларды жапон балуанына өзім беріп қойдым, ал айырмашылықты қысқартуға тырысқаныммен, сәті түспеді. Жапон спортшысы мықты, бірақ бұл біз үшін тоқтау емес", — деді Айтмұхан.
Ризабек Айтмұханның айтуынша, басты нысана — алда келе жатқан жазғы Олимпиада ойындары.
"Олимпиадаға дейін әлем чемпионаты, Азия чемпионаты секілді маңызды жарыстар бар. Бірақ ең бастысы — сол күнге дейін бар күшімізді жинап, бабымызға келу. Олимпиадаға шыңдалған күйде бару — менің басты мақсатым", — деп түйіндеді ол.