Елде бензин қымбаттап жатыр. Астана мен Алматыда халық көп тұтынатын АИ-92 маркалы бензин құны 235 теңгеге жеткен.
Шымкентте де баға біршама өскен. Сарапшылардың айтуынша, отынның құны әлі де қымбаттайды.
АИ 92 маркалы бензин бағасы бір ай ішінде 6 теңгеге көтеріліп, 235 теңгеге жетті. Әсіресе Алматы мен Астанада баға өсімі анық байқалады. Ал Шымкентте халық көп тұтынатын отын құны 20 теңгеге арзандау екен.
Сарапшы Олжас Байділдинов елде бензин құны әрі қарай өсе беретінін айтты. Сөзінше, отынның қымбаттауына бірнеше себеп бар. Негізгісі – ұлттық валютаның әлсіреуі. Демек, теңге құлдыраса, қызмет құны көтеріледі.
“Әр тауардың долларға шаққандағы өзіндік құны болады. Ал біздің отандық отын құнын ақтап отырған жоқ. Өйткені кейінгі 20 жылда бензин бағасы өзгермеді, 2000-жылдары 40 цент еді, қазір де сол қалпында тұр. Ал шығынға ұшырамаудың жолы бағаны кемі 60 центке жеткізу. Меніңше, АИ-92-нің құны литрі үшін түбі 330 теңгеге жетеді”, – дейді сарапшы.
