Тәртіп сақшысы оқиға орнында көз жұмды. Қазір осы факт бойынша тергеу амалдары жүріп жатыр.
Ауа райының қолайсыздығы салдарынан жол қауіпсіздігін бақылап тұрған 27 жастағы патрульдік полиция инспекторы Асанәлі Әскербековті көлік қағып кетіп, қаза тапты. Қайғылы оқиғаға байланысты тергеу басталды.
Қайғылы оқиға 7 желтоқсан күні Астана–Ерейментау–Шідерті автожолында болды.
Алдын ала мәлімет бойынша, Toyota Camry жүргізушісі рөлге ие бола алмай, жол қауіпсіздігін қамтамасыз етіп жүрген патрульдік инспекторға соқтығысқан. Жол-көлік оқиғасы кезінде ауа райы нашарлап, көктайғақ болғаны хабарланды.
Асанәлі Әскербеков ішкі істер органдарында 5 жыл қызмет етіп келген. Артында жұбайы мен екі баласы қалды. Кіші сәбиіне 40 күн де толмаған.
Облыстық ПД басқарма бастығы Ғалымжан Садықов жағдайға қатысты түсініктеме берді:
«Полиция департаментінің басшылығы мен жеке құрам қаза тапқан әріптестерінің туыстары мен жақындарына қайғырып көңіл айтады. Toyota Camry автокөлігінің жүргізушісі рөлді басқара алмағаны және жүргізушілерге қауіп туралы жол қауіпсіздігін қамтамасыз еткен патрульдік полиция инспекторына соқтығысуына жол бергені алдын ала анықталды. Осы факті бойынша мұқият және обьективті тергеу жүргізілетініне сендіреміз».
