Футболдан Қазақстан ұлттық құрамасының бас бапкері Әли Әлиев алдағы жолдастық кездесулер қарсаңында басты мақсатты атады.
Баспасөз жиынында ол Беларусь және Солтүстік Македонияға қарсы матчтарға қатысты нақты мәлімдеме жасады.
“Басты мақсат – нәтиже. Қарсылас кім болса да – Беларусь пе, әлде басқа құрама ма – біз үшін бастысы осы. Сонымен қатар алты ауыстыру құқығын да барынша тиімді пайдаланамыз. Бұл – Солтүстік Македониямен ойнайтын жігіттерді дайындау үшін қажет”, – деді Әлиев.
Бапкердің сөзінше, ұлттық құрамадағы ойыншылар өз клубтарында басқа тактикалық жүйеге үйреніп қалған, ал мұнда оларға жаңа талаптар қойылады. Сол себепті бейімделуге уақыт керек.
Әлиев дебютанттарға да мүмкіндік берілетінін айтты. Сондай-ақ, ұлттық құраманың бірқатар ойыншылары жастар құрамасына көмектесу үшін төмен түсірілмек.
“Сатпаев U-21 құрамасында ойнайды. Бұл – өте дұрыс шешім. Сонымен қатар тағы алты, тіпті жеті ойыншы жастар құрамасында әрекет етеді”, – деді бас бапкер.
