Польша астанасы Варшавада өткен Еуропа лигасының бірінші іріктеу кезеңінің алғашқы матчында "Ақтөбе" жергілікті "Легиямен" кездесті.
Матч басталысымен-ақ "Легия" шабуылды үдетіп, басымдық танытты. Дегенмен ақтөбеліктер жылдам қарсы шабуылмен жауап беріп отырды. Бір сәтте Оралхан Өміртаев қақпашымен жеке-дара шығып, допты торға тоғытқан еді. Алайда бұл гол VAR жүйесі арқылы офсайд деп танылды.
Польшалық клубтың шабуылы жалғасып, бірінші таймның ортасына қарай Ваган Бичахчян алыстан бағыттаған соққысымен есеп ашты. Бұл — ойын барысында соғылған жалғыз гол болды. Екінші таймда екі команда да бірнеше мүмкіндікке ие болғанымен таблодағы көрсеткіш өзгеріссіз қалды.
Қарымта кездесу 17 шілдеде Ақтөбедегі Орталық стадионда өтеді.
