Шымкенттің "Ордабасы" футбол клубы өз түлегі Еркебұлан Тұңғышбаевпен қош айтысты.
Клубтың ресми хабарламасында 30 жастағы вингермен келісімшарттың екіжақты келісім арқылы бұзылғаны көрсетілген. Еркебұлан – "Ордабасы" жүйесінде тәрбиеленген, клубтың тарихи ойыншыларының бірі.
"Ордабасы" сапында ол 248 матч өткізіп, 35 гол соғып, 24 нәтижелі пас берген.
Еркебұлан Тұңғышбаев 2016–2021 жылдар аралығында Қазақстан құрамасына шақырылды. 12 кездесуге қатысып, бір голмен есте қалған. Ол ел чемпионатындағы тұрақты ойынымен ұлттық құраманың негізгі мүшелерінің бірі болған.
Transfermarkt порталының мәліметінше, ойыншының қазіргі нарықтық бағасы – 200 мың еуро, бұл шамамен 122,7 миллион теңгеге тең.
Айта кетейік, 17 шілде күні "Ордабасы" Конференциялар лигасының алғашқы іріктеу кезеңінің жауапты кездесуін өткізеді. Команда Шымкентте грузиялық "Торпедоны" қабылдайды.
Бірінші матч 4:3 есебімен "Торпедоның" пайдасына аяқталған.
