Әлем чемпионатына іріктеу аясында Қазақстанмен кездесетін Уэльс құрамасының бас бапкері Крейг Беллами жасанды газонға алаңдаушылық білдірді. Ол мұндай алаңдар жоғары деңгейдегі футболға жарамайды деп есептейді.
4 қыркүйекте Астанада Қазақстан мен Уэльс құрамалары әлем чемпионаты–2026 іріктеу матчын өткізеді. Дегенмен қарсыластың бас бапкері ойын алдындағы ресми сұхбатында алаң сапасына қатысты сын айтты.
Белламидің сөзінше, жасанды жабын ойыншылардың денсаулығына қауіп төндіреді:
«Әдетте біз мұндай алаңдарда ойнамаймыз және мен оларды ұнатпаймын. Ашық айтайын, мұндай жабындарға мүлде қажеттілік жоқ деп ойлаймын. Төменгі лигаларда қаржы жетіспегендіктен табиғи газонды ұстап тұру қиын екенін түсінемін. Бірақ ең жоғары деңгейде алаң тек табиғи шөп болуы тиіс. Әрине, Бельгияда да бір-екі жасанды алаң бар, бірақ бұл басқа жағдай», – деді ол Nation Cymru-ге берген сұхбатында.
Бапкер жасанды газондағы ойын ерекшелігіне де тоқталды:
«Шөптің үстінде сырғанап кетесің, ал жасанды алаңда аяқ тұрып қалады. Соққыны өзің қабылдайсың, айналым жоқ. Бұл аяққа, әсіресе тобық пен буындарға артық салмақ түсіреді. Сондықтан мен ойында емес, ойыннан кейінгі денсаулыққа әсерін көбірек уайымдаймын. Дегенмен кейбір ойыншыларға мұндай алаң ұнайтынын да айта кету керек».
Қазақстан астанасындағы ойын Astana Arena стадионында өтеді. Бұл нысан жасанды газонды қолданатыны белгілі, сондықтан қонақ командалар жиі шағым айтады. Бұған дейін де бірқатар еуропалық клубтар мен ұлттық құрамалар дәл осындай пікір білдірген болатын.
