«Қайрат» клубы «Пафосқа» қарсы ойында стадионды толтыру үшін шамамен 10 мың билетті тегін таратады.
Алматыда өтетін Чемпиондар лигасының топтық кезеңіндегі үшінші тур матчына билеттердің сатылымы күткен нәтижеге жетпеген. Сол себепті клуб басшылығы радикалды қадамға барған. Бұл туралы Goalkz_official инсайдерлік парақшасы хабарлады.
«Билеттердің сатылымы өте төмен. Стадионның кем дегенде жартысын толтыру үшін клуб ірі компаниялармен келісіп, қызметкерлеріне билеттерді тегін тарату туралы шешім қабылдады. Қазір бірнеше сектор сату жүйесінен алынып тасталды. Ал қалған секторларда 80–90 пайыз орын ашық сатылымнан шығарылды», – делінген хабарламада.
Матчқа арналған билеттердің сатылымы 13 қазаннан бастап басталған. Алайда, жанкүйерлер күткендей, бағаның төмендеуі болмады — билеттердің құны 30 000 теңгеден 250 000 теңгеге дейін сақталды.
Бұл баға диапазоны «Қайраттың» бұған дейінгі «Реалға» қарсы матчындағы деңгейде қалды. Осындай жоғары баға кейбір жанкүйерлер үшін стадионға баруға негізгі кедергіге айналды.
