Қазақстан құрамасының үздік шабуылшысы Никита Михайлис ҚХЛ-дегі "Металлург" клубымен жаңа келісімшартқа қол қойды. Алайда оның табысы күрт төмендеді.
Никита Михайлис өз мансабын Құрлықтық хоккей лигасындағы (ҚХЛ) "Металлург" клубында жалғастырады. Бұл туралы Telegram-дағы "Головой об лёд" арнасы да ақпарат таратты.
Келісімшарт ұзартылғанымен, хоккейшінің жалақысы екі есе қысқарған. Бұған дейін жылына 80 миллион рубль (шамамен 528 миллион теңге) тапқан Михайлис енді 40 миллион рубль (264 миллион теңге) алатын болады.
Өткен ҚХЛ маусымында Никита Михайлис 63 ойынға қатысып, 36 ұпай (12 гол және 24 нәтижелі пас) жинаған.
Плей-офф кезеңінде де белсенділік танытқан хоккейші 6 матчта өнер көрсетіп, 3 ұпайға (2 гол, 1 пас) ие болды.
