Бокстан Қазақстан әйелдер құрамасының капитаны, әлемнің үш дүркін чемпионы Назым Қызайбай Еуропа жұртшылығын күтпеген талантымен таңғалдырды.
Түркияда танымал қабырға суретшісі Дерия Белис өз парақшасында қазақстандық боксшы Назым Қызайбай бейнеленген видеоны жариялады. Кадрларда Назымның натюрморт салып отырған сәті көрсетілген. Оның қолынан шыққан гүлдер шынайылығымен таңдай қақтырып, түпнұсқадан айнымайтын деңгейде бейнеленген.
«Қазір бұл қыз — бокстан әлем чемпионы. Бірақ меніңше, ол бір мезетте суретші де», — деп жазды Дерия Белис Instagram желісінде.
Назым Қызайбай — Қазақстан тарихындағы ең титулды боксшы. Оның қоржынында Парижде өткен 2024 жылғы Олимпиада ойындарының қола жүлдесі және әлем чемпионаттарының үш алтын медалі бар. Енді ол спорттағы жетістіктерімен қатар шығармашылық дарынымен де көпшіліктің назарын аударып отыр.
