Иберия 1999 — Грузия астанасы Тбилисидің Сабуртало ауданында орналасқан футбол клубы. Команда 1999 жылдың 20 тамызында Тбилисиде Сабуртало деген атпен құрылды. 2005 жылы клубты Iberia Business Group компаниясы және оның иесі Тариэл Хечикашвили сатып алды, кейін ол Грузияның спорт және жастар істері министрі болды. 2024 жылдың 27 ақпанында команданың атауы Иберия 1999 болып өзгертілді.
Клубтың екі атауының да өз мәні бар. Сабуртало — команданың академиясы мен Бендела стадионы орналасқан Тбилиси ауданының аты. Иберия 1999 атауы болса, көне заманда Грузия жерінде болған Картли патшалығының латынша Иберия деген атауынан алынған және Пиреней түбегіндегі (Испания, Португалия, Андорра, Гибралтар) Иберияға еш қатысы жоқ.
2014/15 маусымының қорытындысы бойынша Сабуртало Пирвели лигадағы өз тобын екінші орындағы командадан 19 ұпай алшақтықпен жеңіп, Умаглеси лигаға жолдама алды. Элиталық дивизиондағы алғашқы үш маусымда ешқандай тұғырға шыға алмаған команда 2018 жылы бас бапкер Гия Чиабришвилидің басшылығымен тұңғыш рет ел чемпионы атанды. Бір жылдан кейін клуб финалда Локомотивті 3:1 есебімен ұтып, кубок иеленді, ал 2020 жылы чемпион Тбилиси Динамосын жеңіп, Грузия Суперкубогын қанжығасына байлады.
Келесі маусымдарда команда тағы екі кубок пен екі чемпиондық атақ жеңіп алды, тек 2022 жыл ғана ішкі турнирлердің ешқайсысында жеңіске жете алмаған жыл болды. Бапкер Леван Коргалидзенің басшылығымен клуб 2024 жылы екінші рет чемпион атанды, бір жылдан соң бұл табысын қайталады.
Еурокубоктардағы дебютін клуб 2019 жылы жасады: УЕФА Чемпиондар лигасының бірінші іріктеу кезеңінде Молдованың Тирасполь Шерифімен кездесіп, қонақта 3:0 есебімен жеңіске жетті, ал жауап кездесуінің алғашқы он минутында үш гол жіберіп алса да, келесі кезеңге өтті. Команда еурокубоктардың үшінші іріктеу кезеңіне екі рет шықты. 2026/27 жылғы УЕФА Чемпиондар лигасының іріктеуінен шығып қалған соң, Еуропа лигасының плей-офф кезеңіне жетпей, Конференция лигасының лигалық кезеңінен орын алды және бұл турнирдің негізгі кезеңінде өнер көрсететін алғашқы грузин клубы болды.
Үй матчтарын команда Тбилисидегі сыйымдылығы 27 223 көрермендік Михеил Месхи атындағы стадионда өткізеді. Клубтың лақап аты — Қызыл бүркіттер, негізгі ойын киімі ақ, қосалқы жиынтығы қызыл түсті.
Клубтың елдегі ең мықты футбол академияларының бірі бар. Жас футболшылар Бендела стадионында ойнайды, бұл арена Абхазия соғысының батыры, жас футболшы Заза Бенделианидің құрметіне аталған: оған 1993 жылы қайтыс болғаннан кейін Вахтанг Горгасали ордені берілді. Клубтың 19 жасқа дейінгі командасы 2016 және 2022 жылдары жасөспірімдер лигасының чемпионы атанса, 17 жасқа дейінгі құрам 2020 жылдардың басында үш рет жеңіске жетті. Дубль құрамы 2025 жылы Эровнули лига 2-де бір маусым ойнағаннан кейін үшінші дивизионда өнер көрсетеді.
Дереккөз: Уикипедия (CC BY-SA) · penalty.kz редакциясы қазақ тіліне бейімдеді