Әлемнің 11-ракеткасы Александр Бублик 2025 жылғы маусым басындағы ойын құлдырауы және карьенаны аяқтау туралы ойлары жайлы айтты.
Наурыз айында қазақстандық теннисші рейтингте 82-орында тұрған, алайда кейін ATP 250 санатындағы төрт турнирде жеңіске жетіп, «Ролан Гаррос» ширек финалына шықты және өзінің жеке рекордын жаңартты.
"Өткен жылдың соңында және осы жылдың басында өзіме қатты наразы болдым. Тіпті карьерамды аяқтауды да ойладым, себебі топ-100-ден шығып қалудан қорықтым. Бұл бәрін өзгертер еді. Индиан-Уэллс турнирінен кейін үш күнге Лас-Вегасқа барып, ойымды басқа жаққа бөлдім. Сонымен қатар барлығын таразылап, ой елегінен өткізу үшін де қажет болды. Сол жерде өз жолымды таңдадым, содан бері сонымен келе жатырмын"
— Рейтингтегі 11-орын — сіз бұрын мұндай биікке көтерілген емессіз. Себебі неде?
"Ойын мәнерімдегі алуан түрлілікті сақтауға тырыстым, бірақ сонымен қатар әлдеқайда тұрақты болдым. Жаттығуымды сәл өзгерттім. Соның арқасында, мысалы, форхендті жақсарттым — әсіресе топырақ кортта. «Челленджерлерде» өзіме сенім жинадым, ATP турнирлерінің квалификациясынан өттім. Физикалық жағынан да күшейдім. Бұған қоса, ракетканы ауыстыру маған қатты көмектесті. Тіпті оны жеңілдетіп, салмағын 291 граммға дейін түсірдік".
— Карлос Алькарас пен Новак Джоковичтен басқа, осы онжылдықта топырақта, шөпте және хардта бір маусымда титул жеңген жалғыз белсенді теннисшісіз екенін білдіңіз бе?
"Жоқ, білмедім. Бірақ бұл — дұрыс жолда келе жатқанымды көрсетеді. Менің мақсатым — үздік ондыққа кіру. Бұл — менің арманым. Қазір мен өз потенциалымды толық пайдаланып, мұқият еңбектенуді жалғастырсам, шынымен де оған қол жеткізе алатыныма сенім пайда болды", — деді Бублик tennis MAGAZIN журналына берген сұхбатында.
