Таиландтағы күтпеген нәтижемен аяқталған титулды жекпе-жектен кейін қазақстандық боксшылар Елшат Нығметолла мен Армат Арманұлы алдағы жоспарларын нақтылай бастады.
Қазақстандық Irfin Promotions промоутерлік компаниясы Елшат Нығметолла (21-0-2, 8 КО) мен Армат Арманұлының (3-1, 2 КО) болашақ жоспарлары туралы ақпаратты жариялады. Екі боксшы да мамыр айының басында өткен жекпе-жектерінен кейін жаттығу процесін қайта бастап кетті.
Армат Арманұлының келесі қарсыласы, жекпе-жек күні мен өтетін орны расталды. Ресми хабарлама жақын күндері жарияланбақ.
WBA Asia титулының иегері, "Қазақ жауынгері" Елшат Нығметолла Қытайда жекпе-жек өткізуі мүмкін. Қазір бұл бағытта келіссөздер жүріп жатыр.
Соңғы жекпе-жектер: күтпеген нәтиже мен сенімді жеңіс
3 мамыр күні Таиланд астанасы Бангкокта өткен бокс кешінде Елшат Нығметолла намибиялық Филемон Нгутенаньемен (12-0-2, 4 КО) тең түсіп, WBA Asia титулын сәтті қорғады. Бұл жекпе-жектің нәтижесі мамандар үшін күтпеген болды.
Ал Армат Арманұлы үндістандық Рахул Сингхті (10-2, 5 КО) екінші раундта нокаутпен жеңіп шықты.
