Техаста күтпеген жағдай! Қазақстандық файтер Мария Агапова BKFC-дегі дебюті алдында қарсыласын сүйіп, көрермендерді таңғалдырды. Жекпе-жек әлі басталмай жатып, интернетте қызу талқылау тудырған бұл сәт – жаңа спорттық шоудың нағыз бастамасы болды.
Қазақстанның UFC тарихындағы тұңғыш өкілі Мария Агапова АҚШ-та өтетін Bare Knuckle Fighting Championship (BKFC) турнирінде алғаш рет жалаңқол жекпе-жекке қатысады. Бұл оқиға 2025 жылдың 21 маусымында Техас штатында өтетін BKFC 76 турнирінде болмақ.
Финалдық көзқарас дуэлі кезінде Агапова көпшілікті таңғалдырып, қарсыласы Джессика Айды кенеттен сүйіп жіберді. Бұл сәт әлеуметтік желілерде қызу талқылануда. Мұндай әрекет спортта сирек кездеседі және бұл Агапованың жекпе-жек алдындағы психологиялық стратегиясы болуы мүмкін.
Агапованың қарсыласы – 38 жастағы америкалық Джессика Ай, ол UFC-де (5 жеңіс, 10 жеңіліс) және Bellator-да (3 жеңіс, 0 жеңіліс) өнер көрсеткен тәжірибелі спортшы. Соңғы рет ол 2022 жылдың шілдесінде Мейси Барберге ұпаймен жеңіліп, спорттағы мансабын аяқтайтынын мәлімдеген. Алайда енді ол спортқа қайта оралып отыр.
Мария Агапова өзінің соңғы жеңісін 2021 жылдың қазанында Сабина Мазоны жеңіп, UFC аренасында тіркеген. Содан кейін оның көрсеткіштері төмендеп, UFC-де үш жеңіліс, грэпплингте (Karate Combat) бір жеңіліс, бокста бір жеңіліс және бір тең есеп тіркелді.
Айта кетейік, Bare Knuckle Fighting Championship (BKFC) — бұл жалаң жұдырықпен төбелесетін кәсіби лига. Мұнда спортшылар қолғапсыз, партерсіз, тек тұрып төбелеседі. Бұл формат – өте қатал әрі көрерменге қызық, әсіресе UFC-де мансабы тоқтаған спортшылар үшін жаңа мүмкіндік.
Агапова мен Ай арасындағы айқас BKFC 76 аясында өтеді. Бұл турнир Мария үшін жаңа кезеңнің бастауыболмақ. Оның жалаңқол жекпе-жектегі өнері — жанкүйерлер мен сарапшылар үшін қызығушылық тудырады.
