Орта салмақтағы WBO және IBF тұжырымдары бойынша әлем чемпионы Жәнібек Әлімханұлы Доминикан Республикасынан шыққан WBC белбеуінің иегері Карлос Адамеске кезекті рет үндеу жолдады. Қазақстандық мықтының айтуынша, қарсыласы жекпе-жектен қашып жүр.
"Карлосты көргендер бар ма? Ол жоғалып кетті. Егер оны көрсеңіздер, айтыңыздаршы — келісімшартқа қол қойсын!
Карлос, мен сенің қорқынышты түсіңмін!
Ол күйзеліске түскен! Шешім таба алмай жүр! Ол үндемейді. Өйткені өзі де, менеджері де келісімшарттың алдында тұрғанын жақсы біледі!" — деп жазды Әлімханұлы X (бұрынғы Twitter) әлеуметтік желісінде.
Бұған дейін Жәнібек Карлос Адаместі "қорқақ" және "үрейленген қоян" деп атаған болатын. Себеп — Адаместің чемпиондық белбеулерді біріктіруге арналған жекпе-жекке келісім бермеуі.
Қазақстандық жанкүйерлер көптен күткен WBO + IBF vs WBC біріккен титул үшін жекпе-жек әзірге белгісіз себептермен кейінге қалдырылып отыр.
Жәнібек Әлімханұлы кәсіпқой рингте әлі жеңілмеген. Оның техникасы мен панчерлік қабілеті халықаралық деңгейде жоғары бағалануда. Адамес те мықты қарсылас, бірақ жанкүйерлер мен сарапшылар бұл жекпе-жекте Жәнібекті фаворит санайды.
