29 жеңіске жетіп, бірде-бір рет жеңілмеген ол өзін тарихтағы ең ұлы файтер деп есептемейтінін ашық айтты. Хабибтің айтуынша, бұл атаққа Фёдор Емельяненко мен Джон Джонс лайық.
UFC жеңіл салмақтағы (70 келіге дейін) бұрынғы чемпионы, 36 жастағы Хабиб Нурмагомедов, өзін аралас жекпе-жек тарихындағы ең ұлы файтер деп есептемейтінін мәлімдеді. Бұл туралы ол YouTube-тағы adam zubayraev арнасына берген сұхбатында айтты.
«Өзімді ешқашан ең ұлы деп санамадым. Ондай ой да болған емес. Бұл спортпен айналысқан үздіктердің бірі — иә, алғашқы ондыққа, он бестікке енуім мүмкін. Бірақ барлығынан ұлы болдым деу — жоқ. Чемпиондық белбеу алмас бұрын мен үшін ең үздік Фёдор Емельяненко болды. Қазір бірінші орынға Фёдор мен Джон Джонсты қатар қоямын», — деді Хабиб.
Хабиб Нурмагомедов 2020 жылдың 24 қазанында UFC 254 турнирінде соңғы рет октагонға шыққан болатын. Абу-Даби маңындағы Яс аралында өткен жекпе-жекте ол жеңіл салмақтағы уақытша чемпион, америкалық Джастин Гэтжимен кездесіп, екінші раундта "triangle choke" әдісімен жеңіске жеткен еді. Бұл оның мансаптағы 29-шы жеңісі болды. Жекпе-жектен кейін Хабиб ММА-дағы мансабын аяқтағанын жариялады.
