Канададағы Монреаль қаласында өткен бокс кешінде ресейлік Владимир Шишкин (16-2, 10 КО) ауыр жеңіліске ұшырады. IBF суперорта салмақтағы (76,2 кг дейін) элиминатор жекпе-жегінде ол кубалық нокаут шебері Ослейс Иглесиасқа (14-0, 13 КО) төтеп бере алмады. Сонымен қатар жекпе-жекте Иглесиастың IBO нұсқасы бойынша әлем чемпионы атағы да қорғалды.
Алғашқы раундтардан-ақ кубалық боксшы әдеттегідей агрессиямен кірісті. Шишкин қарсыласының соққыларынан сескенгенімен, кей сәттерде қарсы шабуыл жасап көрді. Алайда Иглесиастың сериялық және ауыр соққылары ресейлікке үлкен қысым жасады.
Шишкиннің басты артықшылығы – соққыға төзімділігі ғана болды. Ол көп соққы жіберіп алды, қорғаныста сенімсіз көрінді.
Орта раундтардан бастап жекпе-жек бір жақты сипат алды. Иглесиас әр соққысымен нокаут іздеді, бірақ комбинация қолданбай, үнемі ауыр соққы жасауға ұмтылды. Ал Шишкин толыққанды қарымта қайтара алмай, тек қорғанумен шектелді.
8-раундта жағдай мүлде қиындады. Ресейлік боксшы ауыр соққылардан кейін өзін қорғаудан қалды. Рефери жекпе-жекті уақытылы тоқтатты. Нәтиже: Ослейс Иглесиас – техникалық нокаут (ТКО) 8-раунд.
