Қазақстандық боксшы Назым Қызайбай Ливерпульдегі әлем чемпионатында дебют жасады.
Қызайбай 48 келіге дейінгі салмақ дәрежесіндегі 1/8 финалдық кездесуде Венгрия боксшысы Лилла Селецкимен қолғап түйістірді. Қазақстандық айқын басымдық танытып, қарсыласын үш мәрте нокдаунға жіберді. Екінші раундта — алғашқы нокдаун және үшінші раундта тағы екі рет.
Соңғы құлаған сәттен кейін төреші жекпе-жекті тоқтатуға мәжбүр болды. Осылайша Назым Қызайбай нокаутпен жеңіске жетіп, әлем чемпионатының ширек финалына жолдама алды.
Ливерпульде өтіп жатқан бұл чемпионат — World Boxing ұйымы тарихындағы ересектер арасындағы алғашқы әлемдік дода. Жарыс 14 қыркүйекке дейін жалғасады.
