Қазақстандық ауыр салмақтағы боксшы Айбек Оралбай әлем чемпионатының (World Boxing) ширек финалында айқын жеңіске жетті.
Айбек Ливерпульдегі додада хорватиялық Лука Пратлячичті қазылар шешімімен 3:0 есебімен тізе бүктірді. Бұл жетістік Оралбайды әлем чемпионатының жартылай финалына шығарды. Енді ол кемінде қола жүлдені қалтаға басты.
Айта кетейік, Ливерпульдегі бұл жарыс – World Boxing ұйымы өткізген алғашқы ересектер арасындағы әлем чемпионаты. Сондықтан Оралбайдың жартылай финалға шығуы Қазақстан спорты үшін тарихи белес болып отыр.
