Жамбыл облысының намысын қорғаған тәжірибелі боксшы Әйгерім Сәттібаева бокстан Қазақстан чемпионатының финалына жолдама алды.
Әйгерім Сәттібаева жекпе-жектен кейін өз әсерімен бөлісіп, бұл жетістікке ұзақ жылдық еңбек пен табандылықтың арқасында жеткенін айтты.
«Еңбегім еш кеткен жоқ, ақыры финалға шықтым. Чемпионаттағы бәсекелестік өте жоғары, әсіресе 48 келі салмақ дәрежесінде. Бұл салмақта Назым Қызайбай үш дүркін әлем чемпионы атанған, сондықтан бәсеке әрқашан ауыр. Бірақ біз жеңіске ұмтыламыз және нәтижеге жетіп жатырмыз», — деді ол.
Әйгерім соңғы рет 2015 жылы Қызылордада өткен ел чемпионатында жеңіске жеткенін еске алды. Содан бері алғаш рет финалға шыққан спортшы енді алтын медаль үшін айқасқа түседі.
«Бәрін Аллаға тапсырдым. Ертең бәрі шешіледі. Қайтадан чемпион болсам, еңбегімнің жемісі сол болар еді», — деп түйіндеді ол.
48 келі салмақ дәрежесінде өнер көрсеткен жамбылдық боксшы жартылай финалда қызылордалық Ақтуба Болатты жеңіп, кем дегенде күміс жүлдені қоржынға салды.
Әйгерім Сәттібаева — бес баланың анасы. Соған қарамастан, ол спорттық мансабын жалғастырып, жас боксшыларға үлгі болып жүр.
