Валентина Шевченко UFC 332 турнирінің басты жекпе-жегінде өнер көрсетеді

Басты жекпе-жекке жоспарланбаған

Чемпиондық кездесу 3 қазанда Солт-Лейк-Ситидегі UFC 332 турнирін қорытындылайды. 

Алғашқы жоспар бойынша Шевченко мен Силва арасындағы чемпиондық айқас турнирдің екінші маңызды оқиғасы болуы керек еді.

Басты кездесуде жартылай ауыр салмақтағы уақытша чемпиондық белбеуді сарапқа салу көзделген. Соңғы мәліметтерде Иржи Прохазка мен Пауло Костаның жекпе-жегі талқыланған. Бірақ ұйымдастырушылар жоспарын өзгертіп, Шевченко – Силва кездесуіне басты мәртебе берді.

UFC рекордын жаңарта алады

38 жастағы Валентина Шевченко үшін бұл мансабындағы 14-ші титулдық жекпе-жек болмақ. Бұл – UFC әйелдер дивизиондары арасындағы рекордтық көрсеткіш.

Егер Шевченко Наталья Силваны жеңсе, ұйым тарихында чемпиондық кездесулерде ең көп жеңіске жеткен әйел файтер атанады.

Қырғызстанда дүниеге келген Валентина аралас жекпе-жектегі кәсіби мансабын 2003 жылы бастаған. Ол UFC-де 2015 жылдан бері өнер көрсетеді. Шевченко алғаш рет 2018 жылы чемпиондық белбеуді иеленіп, оны жеті рет сәтті қорғады. Ал 2024 жылы титулын қайтадан қайтарып алды.

Шевченко соңғы рет 2025 жылдың қарашасында UFC 322 турнирінде Вейли Жангты төрешілердің бірауыздан шығарған шешімімен жеңген.

Наталья Силва кім?

29 жастағы бразилиялық Наталья Силва қатарынан 14 жекпе-жекте жеңіске жеткен. Соның сегізі UFC аясында тіркелді. Ол сегіз жылдан астам уақыттан бері жеңілістің ащы дәмін татқан жоқ.

Қазіргі таңда Силва аса жеңіл салмақ рейтингінде бірінші орында тұр. Чемпиондық мүмкіндікке дейін ол UFC-дің бұрынғы үш чемпионын жеңді (Джессика Андраде, Алекса Грассо, Роуз Намаюнас).

Силва аталған үш кездесудің барлығында төрешілердің бірауыздан шығарған шешімімен басым түсті.

Силва несімен қауіпті?

Наталья Силва соңғы жылдардағы Шевченконың ең күрделі қарсыластарының бірі саналады. Бразилиялық файтер чемпионнан тоғыз жас кіші және қазір мансабының кемеліне келген кезеңін өткізіп жүр.

Таэквондомен айналысқан Силва тік тұрыста шебер әрі соққы арсеналы кең. Ол солақай қалыпта айқасып, қарсыласын қашықтықта ұстағанды ұнатады. Сонымен қатар партерде де сенімді әрекет ете алады.