Белгілі қазақстандық боксшы мансап пен тұрмысты қатар алып жүру мүмкін еместігін ашық айтты.
Әлемнің үш дүркін чемпионы, қазақстандық боксшы Назым Қызайбай болашақ өмірлік жоспары туралы пікір білдіріп, бокс пен отбасылық өмірдің бір-бірімен үйлеспейтінін мәлімдеді. Бұл туралы ол Марат Оралғазиннің "Қызық TIMES" бағдарламасында айтты.
Назымның айтуынша, егер тұрмысқа шығып бала көтерсе, спорттық мансабын жалғастыру мүмкін болмас еді:
"Жақында Әйгерім Сәттібаева Азия чемпионатында қола жүлдеге ие болды. Ол — бес баланың анасы. Бірақ менің ойымша, әйел адам үйленгеннен кейін боксты тоқтатуы керек. Себебі баланы ең бірінші болып тәрбиелейтін – ана. Егер спортты жалғастырып, жарыстарға қатысып, бар уақытыңды жаттығуға жұмсасаң, баланың өсуі мен дамуын толыққанды көре алмайсың. Сондықтан бұл тұрғыда менің көзқарасым басқаша".
Назымның бұл пікірі қоғамда түрлі реакция туғызып жатыр. Біреулер оның шешімін қолдаса, енді біреулер әйелдің мансап пен отбасын қатар алып жүре алатынын айтады. Дегенмен Назым өз жолын өзі таңдағанын және бұл таңдау құрметке лайық екенін жеткізді.
