Қазақстанда қай жолдарда орташа жылдамдық бақыланады және қандай айыппұл салынады?
Қазақстанда орташа жылдамдықты тіркеу жүйесі жеті республикалық маңызы бар автожолда іске қосылды. Жаңа бақылау түрі көлік жүргізушілерінен тек камера алдындағы сәттік жылдамдықты емес, жалпы қозғалыс қарқынын да ескеруді талап етеді. Бұл өзгерістер 2024 жылдың соңынан бастап күшіне енді.
“ҚазАвтоЖол( Ұлттық компаниясының мәліметінше, орташа жылдамдықты есептейтін камералар мына жол учаскелерінде жұмыс істейді:
- Астана – Щучинск — 140 км/сағ
- Астана – Павлодар — 140 км/сағ
- Шымкент – Қызылорда — 110 км/сағ
- Шымкент – Тараз — 110 км/сағ
- Павлодар – Семей – Қалбатау — 100-110 км/сағ
- Орал – Ресей шекарасы (Саратов бағыты) — 100 км/сағ
- Павлодар – Ресей шекарасы (Омбы бағыты) — 100-110 км/сағ
Бұл жүйеде жүргізушінің белгілі бір жол аралығын қанша уақытта жүріп өткенін есептейді. Егер сіз кейбір жерлерде 160 км/сағ жылдамдықпен жүріп, тек камераға жақындағанда жылдамдықты төмендетсеңіз де, жалпы орташа көрсеткіш рұқсат етілген шектен асып кетсе — айыппұл салынады.
“Жол қозғалысының қауіпсіздігін сақтау үшін жылдамдық режимін бұзбаңыз”, – деп ескертеді "ҚазАвтоЖол".
Орташа жылдамдықты арттырғаны үшін бөлек жаза енгізілмеген. Айыппұлдар бұрынғы жылдамдықты арттыру ережелеріне сай есептеледі:
- 10-20 км/сағ — 19 660 теңге (5 АЕК)
- 20-40 км/сағ — 39 320 теңге (10 АЕК)
- 40-60 км/сағ — 78 640 теңге (20 АЕК)
- 60 км/сағ және одан жоғары — 157 280 теңге (40 АЕК)
Жыл ішінде қайталанған жағдайда:
- 20-60 км/сағ аралығында — 117 960 теңге (30 АЕК)
- 60 км/сағ және одан жоғары — 235 920 теңге (60 АЕК)
Бастапқы кезеңде орташа жылдамдықты арттырған жүргізушілерге бірден айыппұл салынбаған. Алайда енді барлық жүргізуші жолдың басынан соңына дейінгі қозғалыс қарқынын ескеруі тиіс. Жол ережесін ешкім байқамады деп ойлау — қате түсінік.