«Астон Вилланың» жұлдызы МЮ-де ойнауы мүмкін
«Манчестер Юнайтед» жазғы трансферлік терезеде жаңа қақпашы іздеуді бастады. Клубтың басты нысанасына «Астон Вилланың» аргентиналық қақпашысы Эмилиано Мартинес іліккені белгілі болды.
Бұл туралы британдық басылымдар жазуда, олардың мәліметінше, трансфер бойынша келіссөздер қазір қызу жүріп жатыр.
Transfermarkt дерегінше, Мартинестің нарықтық құны 28 миллион еуроны құрайды. «Манчестер Юнайтед» бұл трансферді жүзеге асыру үшін белсенді түрде әрекет етіп жатыр. Journal du Dimanche және Sky Sports инсайдерлері келіссөздер қызу жүріп жатқанын растайды, алайда тараптар келісімге әлі келген жоқ.
Қазіргі таңда «МЮ» кімге сенім артады?
Андре Онананың жарақатынан кейін, «Юнайтед» сапында тек Алтай Байындыр мен тәжірибелі Том Хитон ғана қалды. 39 жастағы Хитон соңғы маусымда алаңға өте сирек шықты, ал Алтай Премьер-лигада тұрақты ойын тәжірибесіне ие емес. Осыған байланысты Эмилиано Мартинес сынды сенімді қақпашы клуб үшін стратегиялық маңызды трансфер болмақ.
Мартинес 2022 жылы Катарда өткен әлем чемпионатында Аргентина құрамасының негізгі қақпашысы ретінде танылды. Финалда Франциямен өткен ойында шешуші сейв жасап, кейін пенальти сериясында басты кейіпкерлердің бірі атанды. Ол сол жылы The Best FIFA Men's Goalkeeper жүлдесін де жеңіп алды.