Сюрприз! Модрич пен Снуп Догг Англия клубын қолға алды
АҚШ-тың аты аңызға айналған рэпері Снуп Догг пен мадридтік «Реалдың» жартылай қорғаушысы Лука Модрич Англия Чемпионшипінде ойнайтын «Суонси Сити» клубының жаңа тең иелерінің бірі болады.
Бұл туралы беделді инсайдер Фабрицио Романо хабарлады.
«Снуп Догг пен Модрич жаңа инвесторлар тобымен бірге "Суонси" клубының тең иесіне айналады. Бұл қадам жаңа фан-базаны тартуға бағытталған, әсіресе поп-мәдениет арқылы», – деп жазды Романо өзінің ресми X парақшасында (бұрынғы Twitter).
«Суонси» Премьер-лигаға оралуды көздейді
Уэльстің «Суонси Сити» командасы 2023/24 маусымында Чемпионшипте 11-орын алды. Команда соңғы рет Ағылшын Премьер-лигасында 2017/18 маусымында ойнаған болатын. Клуб басшылығы бірнеше жыл бойы элиталық дивизионға оралу мақсатында жұмыс істеп келеді. Жаңа инвестициялық бағыт осы стратегияның бір бөлігі.
Поп-мәдениет пен спорт: жаһандық аудиторияға жол
Снуп Догг пен Лука Модрич секілді жұлдыздарды тарту — тек қаржылай қолдау емес, сонымен қатар күшті маркетингтік қадам. Клуб әлемдік деңгейдегі назар мен жастар аудиториясын жаулап алуды мақсат етіп отыр.
Снуп Догг бұған дейін футболға деген махаббатын бірнеше рет айтқан болатын. Ал 39 жастағы Модрич әлі де жоғары деңгейде ойнап жүр және болашақта футболдан тыс жобаларға араласуға мүдделі екені айтылып жүр.