Төрешіні соққыға жыққан қазақстандық команда чемпионаттан шеттетілді
Шымкентте өткен әуесқойлар арасындағы біріншіліктің 7-тур матчы жанжалмен аяқталды. "Тоқболат" пен "Байдалы" арасындағы ойынның 17-минутында "Байдалы" командасының ойыншылары лига өкіліне шабуыл жасағаннан кейін матч тоқтатылды.
Ресми мәлімдеме
Шымкент қалалық футбол федерациясы Instagram парақшасында оқиғаға байланысты ресми хабарлама жариялады. Онда қазіргі уақытта құқық қорғау органдарының қатысуымен ішкі тергеу жүріп жатқаны айтылды.
"Байдалы“ командасы Шымкент қаласының әуесқой командалары арасындағы чемпионаттан шығарылды. Осы матчқа қатысқан барлық ойыншылар Қазақстан футбол федерациясы (ҚФФ) мен Шымкент футбол федерациясының аясындағы барлық жарыстардан уақытша шеттетілді", — делінген хабарламада.
Тергеу жалғасуда
Федерация өкілдері қосымша ақпарат тергеу аяқталғаннан кейін жарияланатынын мәлімдеді.
Шабуылға ұшыраған төреші Абдумуминов Давлатбек дәрігерлердің бақылауында. Медицина мамандары оның жағдайын тұрақты деп бағалап, өміріне қауіп жоқ екенін айтты.