Қазақстан футболындағы "договорняктар" әшкере болды

Қазақстан футболында тағы да үлкен дау шықты. Бас прокурор Берік Асыловтың мәлімдеуінше, елдегі футболшылар мен бапкерлер тарапынан келісілген матчтар ұйымдастыру және букмекерлік ставкаларға қатысу фактілері анықталды. Кейбір клуб ойыншылары тыйымға қарамастан, ондаған миллион теңгені бәс тігуге жұмсаған.

2025 жылы Бас прокуратура Қазақстан футбол федерациясы мен бірқатар клубқа кешенді тексеріс жүргізді. Оның барысында заң бұзушылықтардың ұзын-ырғасы белгілі болды.

«Футболшылар мен жаттықтырушылар еңбек келісімшартында тыйым салынғанына қарамастан, букмекерлік кеңселерде бәс тігуге қатысқан. Мәселен, Ақтөбе қаласында тоғыз футболшы 110 миллион теңгеге бәс тіккен», — деді Берік Асылов.

2 сәуірде Бас прокуратура аталған заңбұзушылықтарды жою үшін ресми түрде Қазақстан футбол федерациясына ұсыныс енгізген.

Федерация тексерістен кейін арнайы «Жол картасын» қабылдады. Оның аясында:

• қаржылық, этикалық және аудит комитеттері құрылады;
• қаржылық тәртіпті күшейтуге бағытталған 33 іс-шара жүзеге асады;
• футболдағы ашықтық пен жауапкершілікті арттыру көзделеді.

Сонымен қатар, кадрлық шешімдер қабылданды. Федерация әкімшілігінің басшысы, басқарушы директор, заңгерлік, маркетингтік және операциялық департамент директорлары, сондай-ақ қауіпсіздік пен интегрити қызметінің жетекшілері қызметінен босатылды.

Бірқатар басқа жетекшілер төмендетілген лауазымдарға жіберілді.

Футболға сенім неге шайқалды?

Қазақстан футболы соңғы жылдары жанжалдардан көз ашпай келеді:

• матчтарға қатысты «договорняк» күдігі,
• қаржылық ашықтықтың төмендігі,
• клубтардың миллиардтаған шығынға ұшырауы.

Бұл жағдай футбол жанкүйерлері арасында да үлкен наразылық тудырып отыр.