Түркістан облысы Арыс қаласының әкімдігі жаңа кәсіби футбол клубының құрылғанын ресми түрде жариялады.
Әкімдік мәліметінше, Арыста жаңа кәсіби футбол клубы жеке кәсіпкер мен демеушілердің жеке қаржысына құрылған.
"Арыс қаласында кәсіпкер мен демеушілердің толықтай жеке қаражатына жаңа кәсіби футбол клубы құрылды. Қала әкімі Қайсар Манқараев жаңадан құрылған „Арыс КФК“ клубының құрылтайшысы, кәсіпкер Арман Пірмановпен кездесіп, клубтың жақын болашақтағы жоспарларын талқылады", – делінген Instagram парақшасында.
Бұған дейін Арман Пірманов "Арыс" ҚФФ лицензиялауынан сәтті өткенін және команданың Қазақстан чемпионатының Бірінші лигасында өнер көрсететінін айтқан.
Айта кетейік, команда өткен маусымда Екінші лигада ойнаған.
2025 жылы БАҚ-та Түркістан облысында бюджет оңтайландыруына байланысты "Тұраннан" өзге футбол клубтары жабылуы мүмкін деген ақпарат тараған. Алайда жеке меншікке өтетін командалар бұл тізімнен тыс қалатыны айтылған. Осы контекстте "Арыс" клубының жеке қаражат есебінен құрылуы аймақтағы футболдың сақталуына бағытталған нақты қадам ретінде бағалануы мүмкін.