Қазақстандық шахматшы Бибісара Асаубаева блиц шахматтан әлем чемпионатының алғашқы финалисі атанды. Отандасымыз жартылай финалда Қытай өкілі Чжу Цзиньэрді айқын басымдықпен жеңді.
Асаубаева жартылай финалдық матчта еш мүмкіндік бермей, үш партияның үшеуін де ұтты. Мұндай сенімді нәтиже қазақстандық спортшыға финалға кедергісіз шығуға мүмкіндік берді.
Финалдың екінші жолдамасы үшін Анна Музычук (Украина) пен Элин Руберс (Нидерланды) тартысты матч өткізіп жатыр. Үш партиядан кейін есеп 1,5:1,5, ал бәсеке жалғасуда.
Еске салайық, блицтен әлем чемпионатының жалпы жүлде қоры — 1 млн еуро. Ойындар 3+2 форматы бойынша өтеді: әр ойыншыға 3 минут, әр жүрістен кейін 2 секунд қосылады.
Турнир 30 желтоқсанда аяқталады.