"Қайрат" ФК Канье Уэстің Алматыдағы концертіне қарсы шықты
Клуб өкілдерінің айтуынша, 14 тамызға жоспарланған іс-шараны Орталық стадионда өткізу мәселесі командамен алдын ала келісілмеген.
Концерт уақыты клубпен келісілмеген
Клуб мәліметінше, Канье Уэстің 14 тамызда Алматының Орталық стадионында концерт беретіні туралы ақпарат бұған дейін әлеуметтік желілер мен бұқаралық ақпарат құралдарында тараған.
Бірақ “Қайрат” басшылығы концерт ұйымдастырушылары мәлімделген күнді клубпен келісіп үлгермегенін атап өтті. Себебі команда Орталық стадионда өз алаңындағы матчтарын өткізеді және еурокубок жарыстарындағы жорығын жалғастырып жатыр.
Қазақстан Премьер-лигасының күнтізбесіне сәйкес “Қайрат” 8 және 15 тамызда Орталық стадионда ел чемпионатының матчтарын өткізуі тиіс. Сонымен қатар 11-13 тамыз аралығында алматылық клубтың еурокубок аясындағы кездесулері өтуі ықтимал.
Концерт көгалға әсер етуі мүмкін
“Қайрат” өкілдері мұндай ауқымды концертті ұйымдастыру үшін сахна мен техникалық құрылғыларды орнатуға және кейін қайта жинауға бірнеше күн қажет болатынын мәлімдеді. Клубтың пікірінше, концерт өткізу футбол алаңына және стадион инфрақұрылымына айтарлықтай салмақ түсіруі мүмкін.
Тығыз спорттық кесте жағдайында мұндай шара көгалдың сапасына, стадионды матчқа дайындауға және ресми кездесулерді талапқа сай өткізуге кері әсер етуі ықтимал.
Футбол клубы Орталық стадионда ұйымдастырылатын кез келген бұқаралық іс-шара бекітілген футбол күнтізбесі ескеріле отырып, барлық мүдделі тараппен келісілгеннен кейін ғана өткізілуі керек екенін еске салды.
“Қайрат” келіссөздер толық аяқталмай тұрып, Орталық стадионды Канье Уэст концерті өтетін орын ретінде ресми жариялау ерте деп санайды.
Алматы әкімдігі концерт туралы ақпаратты растады
17 шілдеде Канье Уэстің Алматыда концерт беретіні туралы ақпарат тарады. Алғашқы болып бұл туралы америкалық әртістің менеджері Джозеф Карре хабарлаған.
Кейінірек Алматы әкімдігі әлемге әйгілі рэпердің концертіне байланысты келісім жасалғанын растады. Алдын ала ақпарат бойынша, Канье Уэстің Алматыдағы концерті 14 тамызда сағат 21:00-де Орталық стадионда өтуі тиіс.
Осыған ұқсас жағдай Астанада болған
Былтыр Астанада америкалық әнші Дженнифер Лопестің концертіне байланысты да футбол клубы тарапынан наразылық айтылған.
1 тамызда өткен концерт алдында “Астана” ФК бас бапкері ауқымды іс-шара команданың жаттығу және матч өткізу жоспарына қолайсыздық туғызғанын мәлімдеген.