Баскетболшы қыздар Азия чемпионатының жартылай финалына шықты
Таиланд астанасы Бангкокте 18 жасқа дейінгі қыздар арасында баскетболдан Азия чемпионатының B дивизионының ойындары жалғасып жатыр.
Таиландқа қарсы сенімді жеңіс
Қазақстан құрамасы ширек финалда турнир қожайыны Таиландты ірі есеппен жеңді. Баскетболшыларымыз ойын басынан-ақ басымдықты өз қолына алды. Қорғаныста сенімді қимылдап, шабуылда мүмкіндіктерін тиімді пайдаланды.
Нәтижесінде Қазақстан құрамасы матчты 62:34 есебімен аяқтады. Осы табыстан кейін қыздар Азия чемпионатының жартылай финалына жолдама алды.
Жартылай финалда Үндістанмен ойнайды
Финалға шығу үшін Қазақстан құрамасы Үндістан баскетболшыларымен кездеседі. Жартылай финалдық матч 18 шілдеде өтеді. Ойын Астана уақытымен сағат 16:30-да басталады.
U18 санатындағы Азия чемпионатының B дивизионында бірінші орын алған команда келесі маусымда элиталық A дивизионында өнер көрсету құқығына ие болады.
Бұл дивизионда құрлықтың ең мықты жасөспірімдер құрамалары сынға түседі. Сондықтан Қазақстан құрамасы үшін Бангкоктегі турнирдің маңызы ерекше.