Айым Таңқыбаева нокдаунмен Азия чемпионатының жартылай финалына шықты (ВИДЕО)
Таиланд астанасы Бангкокта өтіп жатқан U19 жастар арасындағы Азия чемпионатында Қазақстан құрамасының намысын қорғаған Айым Таңқыбаева жарқын жеңіске жетті.
Қазақстандық боксшы кем дегенде қола жүлде иегері
51 келіге дейінгі салмақ дәрежесінде өнер көрсеткен Таңқыбаеваның ширек финалдағы қарсыласы моңғолиялық Сувд-Эрдене Баянмунх болды. Кездесу барысында Айым екінші раундта қарсыласын нокдаунға жіберіп, жекпе-жекті беделді төрешілердің бірауызды шешімімен өз пайдасына аяқтады.
Осылайша, Айым Таңқыбаева жартылай финалға жолдама алып, кемінде қола медальға ие болатыны белгілі болды. Ал моңғолиялық спортшы жарыс жолын осы кезеңде аяқтады.
Таңқыбаеваның биылғы жетістіктері
Айта кетейік, Айым Таңқыбаева биылғы жылдың мамыр айында Шри-Ланканың Коломбо қаласында өткен IBA ұйымдастырған жастар арасындағы Азия чемпионатында алтын медаль жеңіп алған. Ол кезде қазақстандық боксшы 48 келіде бақ сынаған.