WBC тұжырымының міндетті үміткері Мейірім Нұрсұлтанов қайтадан титулдық жекпе-жектен құр қалып отыр.
Доминиканалық боксшы Карлос Адамес (24-1-1, 18 КО) орта салмақтағы WBC тұжырымы бойынша әлем чемпионы атағын америкалық Остин Уильямсқа (19-1, 13 КО) қарсы жекпе-жекте қорғайды.
Бұл кездесу Теофимо Лопес — Шакур Стивенсон арасындағы бокс кешінің андеркардында өтеді. Жекпе-жек 31 қаңтарда Нью-Йорк қаласындағы «Мэдисон Сквер Гарден» аренасында ұйымдастырылады. Қазақстан уақыты бойынша бокс кеші 1 ақпан күні таңертең басталады.
Шараның ұйымдастырушыларының бірі Турки Аль аш-Шейх жекпе-жектердің толық тізімін жариялап, оның ішінде Адамес — Уильямс кездесуі де бар екенін растады.
Айта кетейік, бұған дейін WBC ұйымы Карлос Адамеске қазақстандық үміткер Мейирим Нұрсұлтановпен (20-0, 11 КО) міндетті түрде титул қорғау жекпе-жегін өткізуді тапсырған болатын. Нұрсұлтанов бұл чемпиондық мүмкіндікке 2023 жылдан бері үміткер болып келеді, алайда сол уақыттан бері бірде-бір жекпе-жек өткізген жоқ.
Сонымен қатар, Карлос Адамес орта салмақтағы IBF және WBO нұсқалары бойынша әлем чемпионы Жәнібек Әлімханұлының (17-0, 12 КО) ықтимал қарсыласы ретінде де қарастырылған еді.