Батуми (Грузия) қаласында өткен GFC 36 x GBC 4 аралас жекпе-жек кешінде қазақстандық файтер Қуат Хамитов бразилиялық Алан Силвамен кездесіп, жекпе-жекті бір ауыздан қабылданған төрешілер шешімімен өз пайдасына аяқтады.
Кездесу жартылай орта салмақта ұйымдастырылып, үш раундқа жоспарланған. Айқас толық дистанцияға созылды. Нәтижесінде төрешілер Хамитовтың басымдығын мойындады.
Осылайша Қуат кәсіби мансабындағы 28-ші жеңісіне жетті. Ал Силва профидегі 12-ші рет жеңіліс тапты.
Бұл — Қуат Хамитовтың ММА ережесі бойынша былтыр қазан айынан бергі алғашқы жекпе-жегі. Ол кезде ресейлік файтер Анатолий Бойконы (12-5) да төрешілердің бір ауыздан шешімімен ұтқан.
Ал Алан Силва соңғы рет желтоқсанда октагонға шыққан. Сол кездесуде екінші раундта отандасы Моасир Рошуды (14-10-1) жеңіп, сабмишнмен аяқтаған.
Жекпе-жектен кейін Қуат Хамитов эмоциясын жасырмай, өзінің айқасқа жарақатпен шыққанын айтты және UFC-де өнер көрсетіп жүрген “Шара Буллетке” (Шарабутдин Магомедов) ашық түрде үндеу жасады.
Хамитовтың айтуынша, ол жекпе-жекке бір күн қалғанда жүріп-тұрудың өзі қиын болған. Соған қарамастан қазақстандық файтер октагонда толық үш раунд өткізіп, жеңісті жұлып алды.