Еркін күрестен 23 жасқа дейінгі балуандар арасындағы ел чемпионатында жеңіске жеткен болатын.
Қазақстандық еркін күрес шебері, әлем чемпионы Ризабек Айтмұқан ел чемпионатындағы жеңісінен кейін алдағы жоспарын бөлісіп, 2026 жылға қойған негізгі мақсатын атады.
U-23 санатындағы Қазақстан чемпионатының финалында Айтмұқан 125 келі салмақта өнер көрсетіп, Азия чемпионатының қола жүлдегері Әлімжан Сәлімжанды 11:0 есебімен мерзімінен бұрын жеңді.
Бұл — балуанның осы салмақтағы алғашқы жарысы болды.
Жарыстан кейін Ризабек өзінің күрес стилі туралы айтты:
"Мен әр белдесуге бір ғана тактикамен шығамын — алты минут бойы соңына дейін күресу. Барлық әрекетім жаттығуда пысықталған дүниеге негізделген", — деді ол.
Айтмұқан 2026 жылғы негізгі мақсаты ретінде Азия ойындарын атап өтті.
"Биылғы басты мақсат — төрт жылда бір рет өтетін Азия ойындары. Сонымен қатар әлем чемпионаты мен Азия чемпионатына да қатысамыз", — деді балуан.
Қазақстан кубогында Айтмұқан 125 кг емес, 97 келі салмақта өнер көрсетуді жоспарлап отыр. Бұл оның жаңа салмақта өзін сынап көруге дайын екенін көрсетеді.