Шұғыла Өмірбек Қазақстанға әлем чемпионатының алтыншы медалін әкелді
Үшінші орын үшін белдесуде отандасымыз Украина өкілі Снежана Онуфриеваны тартысты кездесуде 11:10 есебімен жеңді.
Қазақстандық балуан Шұғыла Өмірбек АҚШ-тың Лас-Вегас қаласында өтіп жатқан 23 жасқа дейінгі спортшылар арасындағы күрестен әлем чемпионатында қола медаль иеленді.
55 келіге дейінгі салмақ дәрежесінде сынға түскен қазақстандық спортшы үшінші орын үшін белдесуде Украина өкілі Снежана Онуфриеваны тартысты кездесуде 11:10 есебімен жеңді.
Қолаға дейінгі жол
Шұғыла Өмірбек ширек финалда жапониялық Юна Саватаниға 3:5 есебімен жол берді.
Одан кейін жұбаныш белдесуінде Моңғолия өкілі Халиун Бямбасурэнгийннен басым түсіп, қола медаль үшін күресуге мүмкіндік алды.
Шешуші белдесуде қазақстандық балуан бір ұпай айырмасымен жеңіске жетіп, жүлдеге қол жеткізді.
Қазақстан үшін әйелдер күресіндегі алғашқы медаль
Шұғыла Өмірбектің бұл жүлдесі Қазақстан үшін 2026 жылғы U23 әлем чемпионатындағы әйелдер күресінен алғашқы медаль болды.
Бұған дейін Қазақстан қоржынына грек-рим күресінің өкілдері бес жүлде салған еді.
Әлем чемпиондары:
- Айбек Айтбеков – 60 кг;
- Юсуф Ашрапов – 72 кг.
Күміс жүлдегер:
- Темірлан Тұрдақын – 87 кг.
Қола жүлдегерлер:
- Арсен Жұма – 55 кг;
- Джохар Ұзаров – 130 кг.