Әлем чемпионаты Бақыт Сәрсекбаевтың болашағына қалай әсер етеді?

Бапкер ретінде өзін дәлелдей ала ма?

Қазақстан боксының тарихында Олимпиада ойындарының алтын медалін жеті боксшы жеңіп алған. Бірақ олардың екеуі ғана кейін ұлттық құрамалар жүйесінде бапкерлік қызмет атқарған.

Алғашқылардың бірі – Сидней Олимпиадасының жеңімпазы Ермахан Ыбырайымов. Ол Қазақстан құрамасын 2004 жылғы Афина Олимпиадасына дайындаған. Сол жарыста Бақтияр Артаев чемпион атанып, Геннадий Головкин күміс жүлдені иеленді.

Енді осындай жауапкершілікті 2008 жылғы Бейжің Олимпиадасының чемпионы Бақыт Сәрсекбаев арқалап отыр.

Әлеуметтік желілерде Сәрсекбаевтың жанкүйерлері көп болғанымен, оның бапкерлік жұмысына қатысты пікірлер әртүрлі. Бірі жастарға мүмкіндік беретін маман ретінде бағаласа, енді бірі оның шешімдеріне күмән келтіреді.

Жұмысы неге сынға ұшырады?

Әлем чемпионаты қарсаңында Қазақстан бокс федерациясының өкілі ретінде аталған Мырза Еркінбек Бақыт Сәрсекбаевтың қызметіне қатысты қатаң пікір білдірген.

"Бұл адамды жастар құрамасына біз тағайындағанымыз жоқ. Оның пайдасынан зияны көп. Ол жақта немен айналысып жүргендеріңізді өздеріңіз де білмейсіздер. Мен барлық шындықты білемін. Жақында естисіздер", – деген Мырза Еркінбек.

Бұл мәлімдеме Сәрсекбаевтың бапкерлік қызметіне қатысты пікірталасты күшейтті.

Дегенмен оның жұмысын қолдайтын мамандар да бар. Олар Олимпиада чемпионының жастар боксын дамытуға және ұлттық құраманың резервін қалыптастыруға бағытталған бастамаларын жоғары бағалайды.

Жастар құрамасындағы өзгерістер қандай нәтиже берді?

Бақыт Сәрсекбаев бірнеше жыл бойы Қазақстанда боксшылардың резервтік құрамасын құру идеясын көтеріп келген. Ақырында бұл бастама 2024 жылдың соңында жүзеге аса бастады.

2025 жылғы ақпанда Талдықорғанда резервтік құрамалар арасындағы алғашқы Қазақстан чемпионаты ұйымдастырылды. Осы жарыста Сәрсекбаев ұлттық құрамаға енбеген бірқатар талантты боксшыны байқады. Солардың бірі – Нұрислам Қалдыбаев.

Жас боксшы 2025 жылы екі ірі құрлықтық жарыста топ жарды:

Шри-Ланкада өткен ASBC Азия чемпионатында алтын медаль жеңіп алды;
Бангкоктағы World Boxing ұйымдастырған Азия біріншілігінде чемпион атанды.

Дегенмен Сәрсекбаевтың жұмысын сынайтындар Қалдыбаевтың 2025 жылғы Қазақстан чемпионатында жүлдесіз қалғанын алға тартады. Сонымен қатар оның шәкірттері World Boxing аясында өткен екі Азия чемпионатында жалпыкомандалық есеп бойынша Өзбекстан құрамасынан қалып қойған. Ал бапкерді қолдайтындар 2025 жылы қазақстандық боксшылардың финалдағы жекелей кездесулерде өзбекстандық қарсыластарынан басым түскенін атап өтеді.

Әлем чемпионатына баратын құрам неге талқыланып жатыр?

Будвадағы әлем біріншілігіне жасақталған Қазақстан құрамасына қатысты да пікірталас бар. Кейбір сарапшылардың айтуынша, 19 жасқа дейінгі құрамадағы жекелеген боксшылар спаррингтік кездесулер өткізбей іріктелген болуы мүмкін.

Десек те мұндай тәжірибе бұған дейін Нұржан Насанов жетекшілік еткен ұлттық құрамада да қолданылғанын еске салады. Атап айтқанда, Азия ойындары алдында 80 және 90 келіге дейінгі салмақ дәрежелерінде осындай шешімдер қабылданған. Бақыт Сәрсекбаев әлем чемпионатына халықаралық жарыстарда көзге түскен бірнеше жас боксшыны алып барады.

Олардың қатарында:

Бейбарыс Әшірбай;
Владислав Саможонов;
Тимур Тайбеков бар.

Аталған боксшылар Futures Cup турнирінде және 2026 жылы Индонезияда өткен Азия чемпионатында жақсы өнер көрсеткен. Сонымен бірге құрама сапында көпшілікке әлі кеңінен таныла қоймаған боксшылар да бар.

"Мен жаңа есімдерді ашудан қорықпаймын" – Бақыт Сәрсекбаев

Олимпиада чемпионы жастар құрамасына қатысты ұстанымын түсіндіріп, боксшыларды таңдауда тәуекелге баруға дайын екенін жеткізді.

"Мен жаңа есімдерді ашудан қорықпаймын. Егер жауапкершіліктен қашып, өзгеріс жасаудан тайсақтап, тек бұрыннан танымал әрі нәтижесі бар боксшыларды таңдай берсем, мені ешкім сынамас еді. Ал жаңа спортшылар жеңіліп қалса, бәріңіз мені кінәлайтыныңыз анық.

Соған қарамастан әр турнирге әртүрлі боксшыларды апарып, олардың мүмкіндігін тексеруге және тәжірибе жинауына жағдай жасауға дайынмын. Өйткені мен жастармен жұмыс істеймін. Біздің міндетіміз – тек бүгінгі құрамды емес, болашақ ұлттық құраманың мықты резервін қалыптастыру. Әрине, кез келген тәжірибенің тәуекелі болады. Бірақ болашақты ойлайтын бапкер мұндай қадамнан қорықпауы керек. Егер тек бүгінгі нәтижені ойласақ, ертеңгі чемпиондарды байқамай қалуымыз мүмкін.

Менің мақсатым – қазіргі алтын медальдарды санау ғана емес, ертең Қазақстан намысын қорғайтын чемпиондардың тұтас буынын тәрбиелеу. Әр салмақта бірнеше мықты боксшымыз болуы тиіс. Мен жастарға сенемін және оларға мүмкіндік беремін. Ал сол мүмкіндікті пайдалану спортшылардың өз қолында", – деді Бақыт Сәрсекбаев.

Будвада Қазақстанды қандай қарсыластар күтіп тұр?

Бұған дейін Сәрсекбаев жетекшілік еткен жас боксшылар негізінен Азия деңгейіндегі жарыстарда сыналған. Ал халықаралық Futures Cup турнирінде Қазақстан құрамасы жоғары нәтиже көрсетіп, жеті медаль жеңіп алған. Бірақ Черногориядағы әлем чемпионатында бәсекелестік әлдеқайда жоғары болады.

Турнирге Ресей құрамасы да қатысуға өтінім берген. Сондай-ақ Өзбекстан мен Украина жарысқа мықты құрамаларын алып келеді.

Оның үстіне, екі жыл бұрын World Boxing ұйымдастырған алғашқы U19 әлем чемпионатында қазақстандық боксшылар бірқатар даулы төрешілік шешімге тап болған. Финалдық кездесулердің кейбірінде Уэльс пен Австралия боксшыларының жеңісі қазақстандық тараптың наразылығын тудырған еді. Сондықтан биылғы әлем біріншілігінде Қазақстан боксшыларын оңай қарсыластар күтіп тұрған жоқ.