Актриса әрі әнші Мөлдір Мұқанова өзінің алғашқы кинотуындысының түсірілім алаңында сезімге ерік беріп, жылап қалды. Бұл сәт желі қолданушыларына ой салды.
Белгілі әзілкеш Тұрсынбек Қабатовтың жары, соңғы уақытта әншілік өнерімен де көзге түсіп жүрген Мөлдір Мұқанова "Шәй в большом городе" атты дебюттік фильміне түсіп жатыр. Ол Instagram желісінде түсірілім кезіндегі ерекше сәттердің бірін жариялады.
Мөлдір жүктеген видеода сахнада әрдайым жарқырап жүретін өнер иесінің камера сыртында көзіне жас алғаны бейнеленген. Бұл тек эмоция емес, жылдар бойы жиналған жүрек сырының бір сәттік көрінісі іспетті.
"Күлкімен көмкерілген сахна образының ар жағында көз жасына толы шындық жатыр. Бұл кадр – жай ғана жылау емес. Бұл – іште тұнған сезімнің үнсіз үні", – деп жазды Мұқанова.
Фильм түсіріліміне қатысушылар да Мөлдірге қолдау білдіріп, оны сабырға шақырды:
"Бәріне қарамастан әлі-ақ жарқырайсың. Киноң сәтті шығады. Өмір де қалыпқа келеді. Қымбаттым, жыламашы. Мені де жылатасың. Білем, қазір ауыр. Бірақ Алла тағала бәрін өз орнына қояды. Сен мықтысың", – деген сөздер жазылған кадрда.
