Белгілі әнші Нұрлан Еспановтың ұлы – Олжас Еспанов жеке көлігімен қонақтан қайтып келе жатқанда бейнебақылау камерасына түсіп қалып, айыппұл арқалағанын әлеуметтік желіде хабарлады.
Олжас Еспанов Instagram парақшасында жақында Жуалы өңіріне күйеу бала ретінде қонаққа барғанын баяндады. Оның айтуынша, Тараздан келген туыстармен жақсы отырыс өткен.
"Тойдан кейін алғаш рет есік ашып баруымыз. Ет асып, ағайындармен бас қосып, ерекше күн өткіздік. Жол жүрген ұнайды, ойыңды жинап аласың. Қонақтарды шығарып салған соң, шай ішіп қайттық", – деп жазды ол.
Жолдан қайтып келе жатқанда жас әнші бейнебақылау камерасына түсіп қалған. Бұл туралы өзі де таңданыспен және әзілге бейім тілмен жазды:
"Аясаңдар қайтеді? Бір қонаққа барып келе салайыншы десең, жырқ еткізіп айыппұл сала салады екен", – деп жазды Олжас Еспанов.
Оқырмандардың бір бөлігі оның басынан өткен жағдайды түсіністікпен қабылдап пікірлер қалдырса, енді бірі жолда сақ болуға үндеді. Дегенмен Еспановтар әулетінің бұл жазбасы әлеуметтік желіде кеңінен таралып жатыр.
