Қазақстандық танымал әнші Мәдина Сәдуақасова желідегі оқырмандарына ерекше демалысынан видео көрсетті. Әдетте сахнада жарқыраған өнер иесі бұл жолы табиғат аясында отбасы мүшелерімен бірге тынығуды таңдаған.
Әншінің айтуынша, бұл — жыл сайынғы отбасылық дәстүрге айналған демалыс. Сәдуақасова бұл сәттерді былай суреттейді:
“Жылына бір рет, әлеуметтік желілер мен у-шудан алыс жерге барып демаламыз. Қамыстың арасында, тек табиғат құшағында боламыз. Байланыс жоқ, Instagram жоқ – тек тыныштық пен отбасы. Бізге бұл ерекше ұнайды. Қызыл кітапқа енген сирек құстар да қасымызда ұшады. Кешкісін алып балықты отқа қақтап, от басында әдемі естеліктер айтамыз”, – деп жазды әнші.
Мәдинаның айтуынша, бұл демалыс – оның ұлы Әнуар мен жұбайы Олжастың сүйікті сәті. Екеуі де балық аулауға құмар, ал Мәдина олардың қуанышын көріп, өзі де ерекше шабыт алатынын жасырмайды.
“Олжас пен Әнуар – нағыз әуесқой балықшылар. Мен олардың қуанышын көріп, екі есе бақытты боламын. Бұл жерге келу – біздің отбасылық дәстүрімізге айналды. Келер жылы міндетті түрде тағы келеміз!” – деп жазды ол.
